Буре ваён 68 ар ортчыса

     «Ожмаськонэ быремъёслы сӥзем памятник малы меда гуртамы уг пукто?» - таӵе юан мынам йырам пичи дыръям ик кылдылӥз. Гуртоосме но со сюлэмшугъяськытылӥз, дыр. Геройёслэн нимъёссы школалэн коридораз огшоры пул вылын ошиськыса улӥзы. Собере школамы ворсаськиз. Ожысь ветеранъёслэн фамилиоссы пумен вуныны кутскизы. 1941- 1945-тӥ аръёсы Алтау гуртысьтымы 66 адями бырыны шедиз. 47-езлы улэп бертыны кылдӥз. Аръёс ортчемъя соос но тросэз кулӥзы. Туннэ нуналэ кыкез гинэ ожысь ветеранъёс улэп на.

     Вормон дырысен куатьтон тямыс ар ортчыса, Алтау гуртамы памятник кылдӥз. Сое пуктон понна гуртысь котькуд семья быгатэмезъя аслэсьтыз уксёзэ висъяз, коньдон ласянь ёрос администрация но юрттӥз. Обелискез ӝутыны трос сюлмаськиз Бурай рунолэн кивалтӥсез Н. М. Хаматдинов. Николай Меншарапович вордӥськемын Алтау гуртын, солэн аслаз но песятаез ожмаськонэ быремын. Памятниклы проект кивалтӥсь ачиз ик лэсьтӥз. Гуртысь дышетӥсь Виктор Марданов кышноеныз Надеждаен но атаеныз ӵош, клубен кивалтӥсь Ирина Шарафутдинова картэныз Фанилэн, Митя Гайниев обелискез кылдытон бордын быдэс гужем тыршизы, шуыны луэ. Асьсэ мылкыд каремзыя ужазы, соослы уждун но ӧз висъялэ. Тӥни сыӵе адямиос вань на. Гуртысьтымы мукетъёсыз улӥсьёс но памятникез кылдытонлэсь палэнэ ӧз кыле, соос клуб но выль обелиск котырез чеберъянэ пыриськизы.

     Гудырикошкон толэзь пумын обелискез сӥё-дано усьтон вал. Отчы быдэс гурт калык люкаськиз. Бускель гуртъёсысь, ёрос центрысь, Ижкарысь но куноос вуизы. Башкир Элькунлэн Кун кенешезлэн - Курултаезлэн тӧроез К. Б. Толкачёв но та ужрадэ пыриськиз. Нунал шундыё тупаз. Со нуналэ клуб вӧзы интыяськем выль обелиск дорын чузъяськизы тодэ ваёнъёс но, кырњанъёс но, тау карон кылъёс но. Памятник чебер пӧрмемын. Мукетъёсызлэсь со висъяське тани ма ласянь но: отчы ожмаськонэ быремъёслэн сяна, войнаысь улэп бертыса туала вакытэ кулэмъёслэн нимъёссы но пыртэмын. Озьы гуртысь котькуд семьялы та памятник дуно луэ.

     Ож лудэ бырем землякъёсылы сӥзем кылбурме памятник усьтыку лыдӟи:

Тӥ кошкиды витёнтэм но шорысь

Та югыт но валантэм дуннеысь,

Семьядэс, эшъёстэс кельтыса,

Егит дыр вакыттэс куштыса.

Тӥ кошкиды, Вормонлы оскыса,

Малпанъёстэс сьӧрады нуыса.

Тӥ кошкиды… мукетаз дуннее.

Тӥ кошкиды…

Дор палады выльысен бертыны.

Тӥ бертӥды дорады дыртытэк,

Гуртъёсы, каръёсы пыраса.

Вамышъяды жадёнэз валатэк,

Калыкмес адњыны оскыса.

Гуртмылэн шораз ик сылыса,

Тӥ туннэ но кышкасьтэм солдатъёс.

Џуказе нуналлэсь њардонзэ,

Улосмес но шыпытэз утисьёс.

Нимъёсты югдыто Алтаумес,

Яркытгес карыло осконмес.

Тӥ бертӥды…

Гуртоослэн сюлмазы улыны.

     Геройёсты буре вайыны ноку бер ӧвӧл. Вормон дырысен 70 ар тырмонозь кема ӧз кыльы. Ожмаськонэ пыриськем ветеранъёс соку трос уз луэ ни. Жаляса верано луэ, улэп бертэм геройёслэн нимъёссы вуно. Соос Буре ваён книгаосын но, обелисъёсын но ӧвӧл. Ожысь ветеранъёслэн нимъёссылы обелисъёсын ке но инты шедьтоно вылэм.

Ульфат Бадретдинов.

Башкортостанысь Бурай ёрос.