Алтау гуртысь тросэз калык ужа ООО "Победа" хозяйствоын. Соос пӧлын механизаторъёс но вань.Та дыре соос тыршо посевной ужъёсты йылпумьяны. Куд-огез быдэс семьяенызы та уже пыриськемын. Сыӵе династиос пӧлысь одигез - Бадертдиновъёслэн семьязы. Илюс атайзы вӧзын кык пиосыз - Алексей но Дмитрий ужаса ветло. Куиньназы но хозяйство кылдэм дырысен тракторен гырыса но кизьыса ветло, толалтэ Алеша фермаын кормораздатчикын ужа, нош Дмитрий амбар котырын. Али дыре кизён уж бордын тыршо. Алеша атаеныз сменаен кариськыса "Кировец" тракторен кизё. Дима пизы соослы бусые семена поттэ. Илюслы алигес 50 арес тырмиз. Хозяйство солы умой ужамез понна кузьым но сётӥз. Пиосыз но сьӧрысьтыз бере уг кылё.

       Озьы ик кужымзэс жалятэк та хозяйствоын Гайдуллин Олег Андрей пиеныз тракторен ужало. Соос бусосты усыязы, али Алтау гурт котырысь бусыосы кизьыны потыны дасясько. Тулыс куазь ӵем вошьяське, то зор, то лымы но усьыны кутске. Озьы ке но соос асьсэ ужзэс быдэстыны тыршо. Техниказы но куд-дырья сӧриське. та дырья ини соослы инженер-механик юрттылэ. Шангараев Сидор туж ответственной ужась, котьку но механизаторъёс дорын. Со ужасьёсты нуыса вайыса кельтэ, обед но ужин но нулдэ, кулэ дырьякуз запчасть но вайыса вутэ.

       Мыло-кыдо ужасьёс пӧлысь одӥгез - Шаймухаметов Роберт. Та хозяйствое со кема ӧвӧл гинэ бертӥз ке но, ассэ тыршись адямиен возьматӥз. Та дыре со Т-150 трактореныз культивация ортчытэ, бусыосты кизьыны дася.

       Таӵе ужасьёсын бусы ужъёссы ӝоген быроз, урожайзы удалтоз. Куазь гинэ мед кельшоз.