Вазь чукна. Гурт кӧлэ на. Номыр уг люкеты солы изьыны. Сьӧд чагыр инбамын пишто на кизилиос, толэзьлэн югытаз чиляло азвесь кадь лымы пырыос.

   Тани кытысь ке уй палась пельтӥз ыркыт тол. Шыпыт сылӥсь писпуос куашетӥзы, уин гӧртэм вайёсысьтызы каллен гинэ музъем вылэ лымы пырыос вияны ӧдъязы. Ческыт умен кӧлӥсь зольгыриос но сайказы. Кышкатскыса-а мар-а одӥг писпуысь мукетаз лобӟизы. Тани кытын ке атаслэн чоръям куараез кылӥськиз. Сое кылыса мукет атасъёс но чоръяны кутскизы. Нунал сайказ. Бадзым кызьпуын пукись куакаос куаретыны кутскизы, инмысь кизилиос но ӧжыт гинэ адӟисько на.

   Шунды ӝужан палась инбам шушылэн гадез кадь ик гордэктыны ӧдъяз. Толалтэ шунды кема ӝужа. Нош туннэ, оло пилемъёс ӧвӧлӥсь-а мар-а, солэн сайкамез адӟиське ини. Гурт но сайказ: коркаослэн укнооасазы тылъёс жуатскизы, муръёостӥ ӵын потыны кутскиз. Отын но татын ӧс усьтаськем-ворсаськем куараос кылӥсько. Урамтӥ адямиос ужаны дыртто, вал пытьы но дӧдьы ӟукыртэм куараос урам тыр шуккисько. Сое кылыса азбарысь пуныос уто…

   Озьыен вуиз выль нунал. Кин тодэ, кыӵе луоз со, мар ваёз со ас сьӧраз: шумпотон-а, я куректон-а; умойзэ-а, я уродзэ-а…Но котырак учкид ке, адӟид ке кызьы сайка инкуазь, шуыны луоз- выль нунал ваёз выль улон!

Лариса Марданова