Вылькенак секта ваем вуэныз бадьнатайзэ но бадьнанайзэ
Выль семья
Нылашез пи доры ваем бере, ӵуказеяз вылькенак пылатон каро. Вылькенакез ведра-карнанэн ошмес дуре вулы нуо пияшлэн ӵыжы-выжыосыз пӧлысь кыӵе ке мӧйы кышномурт кияз ныркышет кутыса, солэн пумаз вылькенакез кутӥськытэ но озьы сое валтыса ошмес дуре нуэ. Соос сьӧры вылькенак адӟыны люкаськем калык но мынэ.
Вылькенак ошмесысь ву омыртэмезлэсь азьвыл уксё куштэ вукузёлы шуыса. Азьло дыръя азвесь коньдон кушто вылэм, али нош котькыӵе тӧдь корт уксё но яра. Вылькенак ву омыртыны турттыкуз люкаськем калык солы юри люкетыны тырше, я донге, я вузэ кисьтэ. Со вакытэ ик соос ог-огзэс но вуэн пылатъяса шудо.Озьы кык пол вылькенак ву омыртыны уг быгаты, куиньметӥяз гинэ ведраосаз тыр карыса ву басьтэ но сое, ошмес дуре лыктыкуз кадь ик валтыса, выль улон интыяз нуо.
Ву ваёнэ пияшлэн ӵыжы-выжы туганъёсыз люкасько. Та дырлы ӝук пӧзьтыса дасяло. Нырысь ик ошмес вуэз чаркае поныса вань люкаськемъёслы котыр веръятыса пото, вылькенак секта соосты.Ныркышет вылэ чаркаен ву пуктыса, котькудӥзлы черодэн сётъяса потэ со. Котькудӥз нош ву веръям бераз чаркаез пыдсы коньдон поныса берыктэ. Со коньдонэз вылькенак аслыз каре.
Ошмес вуэз ваньзы котыр веръям бере ӝук сиыны дасясько.Нырысь ик ӝоктэм ӝукен курисько, сое куриськем мурт веръям бере ӝӧк пуме султо бадьнатай но бадьнанай луоно муртъёс.Тусьтыысь ӝукез ог пуньы басьтыса нырысь бадьнанай луон кышномурт веръя но бадьнатай луон муртлы сётэ, соиз но пичияк веръя, собере вылькенаклы сётэ. Озьы куинь пол бӧрсьысь бӧрсьы куриськем ӝукез веръяло. Собере вылькенаклэн йыраз кышет изято но пияшен ӵош миндэр вылэ пуктыса соослы азьлапал улоназы ӟечлыкъёс сӥзьыло.
Ваньзэ тае карем беразы куноос ӝук сиыны кутско. Сииськемзы бере юо но кошкон азязы лыктэм куноос вылькенакен солэсь кузпал луонзэ асьсэ доразы куное ӧтё. Нош нырысь ик куное бадьнатай но бадьнанай луон муртъёс доры мыныны кулэ, соос доры ветлэм бере гинэ мукет туганъёс дортӥ кунояськыса ветлыны яра.
на главную страницу
Басьтэмын Миннияхметова Т. Г., Садиков Р. Р. М62 Ми бурай удмуртъёс… / Т. Г. Миннияхметова, Р. Р. Садиков. –
Тарту$ Уфа$ Иннсбрук, 2005. – 108 б., ил.
ISBN 5-902870-01-1
| 
