Туннэ милям гуртын праздник, вылькенак пылатон. Алтау егит пи - Денис, аслыз пар ваиз Мамадыысь Рита нимо нылэз.

       Ӟечкыласьком Денисэз но Ритаез выль семья кылдытон нуналэнызы. Тӥласьком соослы кузь валче улон сюресъёс. Мед пиштоз со сюрес вылазы яркыт шунды, пельтозы нялтас шуныт тӧлъёс.

Мар со удмуртъёслэн вылькенак пылатон , тодыны луоз та заметкаысь. 

       Нылашез пи доры ваем бере, ӵуказеяз вылькенак пылатон каро. Вылькенакез ведра-карнанэн ошмес дуре вулы нуо пияшлэн ӵыжы-выжыосыз пӧлысь кыӵе ке мӧйы кышномурт кияз ныркышет кутыса, солэн пумаз вылькенакез кутӥськытэ но озьы сое валтыса ошмес дуре нуэ. Соос сьӧры вылькенак адӟыны люкаськем калык но мынэ.